N-Town Cycle, Play 33

[The Harrowing of Hell A]

  1  CHRISTI. Now all mankende in herte be glad
  2  With all merthis ŝat may be had!
  3  For mannys sowle, ŝat was bestad
  4  In ŝe logge of helle,
  5  Now xal I ryse to lyve agayn,
  6  From peyn to pleys of paradyse pleyn.
  7  ŝerfore, man, in hert be fayn,
  8  In merthe now xalt ŝu dwelle!

  9  I am ŝe sowle of Cryst Jesu,
 10  ŝe which is kynge of all vertu.
 11  My body is ded—ŝe Jewys it slew—
 12  ŝat hangyth 3itt on ŝe rode.
 13  Rent and torn al blody red,
 14  For mannys sake my body is deed.
 15  For mannys helpe my body is bred,
 16  And sowle-drynk my bodyes blode.

 17  ŝow my body be now sclayn,
 18  ŝe thrydde day, ŝis is certayn,
 19  I xal reyse my body agayn
 20  To lyve, as I 3ow say.
 21  Now wole I go streyth to helle
 22  And feche from ŝe fendys felle
 23  All my frendys ŝat ŝerin dwelle,
 24  To blysse ŝat lestyth ay.

The sowle goth to helle gatys and seyth: “Attollite portas principes vestras, et eleuamini, porte eternales, et introibit Rex Glorie.”

 25  Ondothe 3oure 3atys of sorwatorie!
 26  On mannys sowle I haue memorie.
 27  Here comyth now ŝe Kynge of Glorye,
 28  These gatys for to breke.
 29  3e develys ŝat arn here withinne,
 30  Helle gatys 3e xal vnpynne.
 31  I xal delyvere mannys kynne;
 32  From wo I wole hem wreke.

 33  BELYALL. Alas, alas! Out and harrow!
 34  Onto ŝi byddynge must we bow.
 35  ŝat ŝu art God now do we know—
 36  Of ŝe had we grett dowte!
 37  A3ens ŝe may nothynge stonde;
 38  Allthynge obeyth to thyn honde;
 39  Bothe hevyn and helle, watyr and londe,
 40  Allthynge must to ŝe lowte.

 41  ANIMA CHRISTI. A3ens me it wore but wast
 42  To holdyn or to stondyn fast.
 43  Helle logge may not last
 44  A3ens ŝe Kynge of Glorye.
 45  ŝi derke dore down I throwe;
 46  My fayr frendys now wele I knowe.
 47  I xal hem brynge reknyd be rowe
 48  Out of here purcatorye.