The Towneley Cycle, Play 11
The Salutation of Elizabeth
Salutacio Elezabeth.

001     Mary. My lord of heuen, that syttys he,
002     And all thyng seys with ee,
003     The safe, Elezabeth.

004     Elizabeth. Welcom, mary, blyssed blome,
005     Ioyfull am I of thi com
006     To me, from nazareth.

007     Mary. how standys it with you, dame, of qwart?

008     Elizabeth. well, my doghter and dere hart,
009     As can for myn elde.

010     Mary. To speke with you me thoght full lang,
011     ffor ye with childe in elde gang,
012     And ye be cald, geld.

013     Elizabeth. ffull lang shall I the better be,
014     That I may speke my fyll with the,
015     My dere kyns Woman;
016     To wytt how thi freyndys fare,
017     In thi countre where thay ar,
018     Therof tell me thou can,
019     And how thou farys, my dere derlyng.

020     Mary. Well, dame, gramercy youre askyng,
021     ffor good I wote ye spyr.

022     Elizabeth. And Ioachym, thy fader, at hame,
023     And anna, my nese, and thi dame,
024     how standys it with hym and hir?

025     Mary. Dame, yit ar thay both on lyfe,
026     Both ioachym and anna his wyfe.

027     Elizabeth. Els were my hart full sore.

028     Mary. Dame, god that all may,
029     yeld, you that ye say,
030     And, blys you therfore.

031     Elizabeth. Blyssed be thou of all women,
032     And the fruyte that I well ken,
033     Within the wombe of the;
034     And this tyme may I blys,
035     That my lordys moder is
036     Comen thus vnto me.
037     ffor syn that tyme full well I wote,
038     The stevyn of angell voce it smote,
039     And rang now in myn ere;
040     A selcouth thyng is me betyde.
041     The chyld makys Ioy, as any byrd,
042     That I in body bere.
043     And als, mary, blyssed be thou,
044     That stedfastly wold, trow,
045     The wordys of oure heven kyng;
046     Therfor all thyng now shall be kend,
047     That vnto the were sayd or send,
048     By the angell gretyng.

049     Mary. Magnificat anima mea dominum;
050     My saull lufys my lord abuf,
051     And my gost gladys with luf,
052     In god, that is my hele;
053     ffor he has bene sene agane,
054     The buxumnes of his bane,
055     And kept me madyn lele.
056     Lo, therof what me shall betyde-
057     All nacyons on euery syde,
058     Blyssyd shall me call;
059     ffor he that is full of myght,
060     Mekyll thyng to me has dyght,
061     his name be blyssed ouer all;
062     And his mercy is also
063     ffrom kynde to kynde, tyll all tho
064     That ar hym dredand.
065     Myght in his armes he wroght,
066     And dystroed in his thoght,
067     Prowde men and hygh berand.
068     Myghty men furth of sete he dyd,
069     And he hyghtynd in that stede
070     The meke men of hart;
071     The hungre With all good he fyld,
072     And left the rich outt shyld,
073     Thaym to Vnquart.
074     Israell has vnder law,
075     his awne son in his awe,
076     By menys of his mercy;
077     As he told before by name,
078     To oure fader, abraham,
079     And seyd of his body.
080     Elezabeth, myn awnt dere,
081     My lefe I take at you here,
082     ffor I dwell now full lang.

083     Elizabeth. wyll thou now go, godys fere?
084     Com kys me, doghter, with good chere,
085     or thou hens gang;. ffarewell now, thou frely foode!
086     I pray the be of comforth goode,
087     ffor thou art full of grace;
088     Grete well all oure kyn of bloode;
089     That lord, that the with grace infude,
090     he saue all in this place.
091