From Stage to Page - Medieval and Renaissance Drama
The York Cycle, Play 35 - Crucifixio Christi
Pynneres and Paynters
001 Miles. Sir knyghtis, take heede hydir in hye,
002 This dede on dergh we may noght drawe.
003 3ee wootte youreselffe als wele as I
004 Howe lordis and leders of owre lawe
005 Has geven dome that this doote schall dye.
006 Miles. Sir, alle thare counsaile wele we knawe.
007 Sen we are comen to Caluarie
008 Latte ilke man helpe nowe as hym awe.
009 Miles. We are alle redy, loo,
010 þat forward to fulfille.
011 Miles 4. Late here howe we schall doo,
012 And go we tyte thertille.
013 Miles 1. It may noyot helpe her for to hone
014 If we schall any worshippe wynne.
015 Miles 2. He muste be dede nedelyngis by none.
016 Miles 3. þanne is goode tyme that we begynne.
017 Miles 4. Late dynge hym doune, than is he done-
018 He schall nought dere vs with his dynne.
019 Miles 1. He schall be sette and lerned sone,
020 With care to hym and all his kynne.
021 Miles 2. þe foulest dede of all
022 Shalle he dye for his dedis.
023 Miles 3. That menes crosse hym we schall.
024 Miles 4. Behalde, so right he redis.
025 Miles 1. Thanne to this werke vs muste take heede,
026 So that oure wirkyng be noght wronge.
027 Miles 2. None othir noote to neven is nede,
028 But latte vs haste hym for to hange.
029 Miles 3. And I haue gone for gere goode speede,
030 Bothe hammeres and nayles large and lange.
031 Miles 4. þanne may we boldely do this dede.
032 Commes on, late kille this traitoure strange.
033 Miles 1. Faire myght yoe falle in feere
034 þat has wrought on this wise.
035 Miles 2. Vs nedis nought for to lere
036 Suche faitoures to chastise.
037 Miles 3. Sen ilke a thyng es right arrayed,
038 The wiselier nowe wirke may we.
039 Miles 4. þe crosse on grounde is goodely graied
040 And boorede even as it awith to be.
041 Miles 1. Lokis that the ladde on lenghe be layde
042 And made me thane vnto this tree.
043 Miles 2. For alle his fare he schalle be flaied,
044 That one assaie sone schalle ye see.
045 Miles 3. Come forthe thou cursed knave,
046 Thy comforte sone schall kele.
047 Miles 4. Thyne hyre here schall thou haue.
048 Miles 1. Walkes oon-now wirke we wele.
049 Jesus. Almyghty God, my fadir free,
050 Late this materes be made in mynde:
051 þou badde that I schulde buxsome be
052 For Adam plyght for to be pyned.
053 Here to dede I obblisshe me
054 Fro that synne for to saue mankynde,
055 And soueraynely beseke I the
056 That thai for me may fauoure fynde.
057 And fro the fende thame fende,
058 So that ther saules be saffe
059 In welthe withouten ende-
060 I kepe nought ellis to craue.
061 Miles 1. We, herke sir knyghtis, for Mahoundis bloode,
062 Of Adam-kynde is all his thoght.
063 Miles 2. þe warlowe waxis werre than woode,
064 þis doulfull dede ne dredith he noght.
065 Miles 3. þou schulde haue mynde, with mayne and moode,
066 Of wikkid werkis that thou haste wrought.
067 Miles 4. I hope that he hadde bene as goode
068 Haue sesed of sawes that he vppe-sought.
069 Miles 1. Thoo sawes schall rewe hym sore
070 For all his saunteryng sone.
071 Miles 2. Ille spede thame that hym spare
072 Tille he to dede be done.
073 Miles 3. Haue done belyue boy, and make the boune,
074 And bende thi bakke vnto this tree.
075 Miles 4. Byhalde, hymselffe has laide hym doune
076 In lenghe and breede as he schulde bee.
077 Miles 1. This traitoure here teynted of treasoune,
078 Gose faste and fetter hym than yoe thre;
079 And sen he claymeth kyngdome with croune,
080 Even as a kyng here hange schall hee.
081 Miles 2. Nowe, certis, I schall noyot fyne
082 Or his right hande be feste.
083 Miles 3. þe lefte hande thanne is myne-
084 Late see who beres hym beste.
085 Miles 4. Hys lymmys on lenghe than schalle I lede,
086 And even vnto the bore thame bringe.
087 Miles 1. Vnto his heede I schall take hede,
088 And with myne hande helpe hym to hyng.
089 Miles 2. Nowe sen we foure schall do this dede
090 And medill with this vnthrifty thyng,
091 Late no man spare for speciall speede
092 Tille that we haue made endyng.
093 Miles 3. þis forward may not faile;
094 Nowe are we right arraiede.
095 Miles 4. This boy here in oure baile
096 Shall bide full bittir brayde.
097 Miles 1. Sir knyghtis, saie, howe wirke we nowe?
098 Miles 2. 3is, certis, I hope I holde this hande,
099 And to the boore I haue it brought
100 Full boxumly withouten bande.
101 Miles 1. Strike on than harde, for hym the boght.
102 Miles 2. 3is, here is a stubbe will stiffely stande,
103 Thurgh bones and senous it schall be soght-
104 This werke is wele, I will warande.
105 Miles 1. Saie sir, howe do we thore?
106 þis bargayne may not blynne.
107 Miles 3. It failis a foote and more,
108 þe senous are so gone ynne.
109 Miles 4. I hope that marke amisse be bored.
110 Miles 2. þan muste he bide in bittir bale.
111 Miles 3. In faith, it was ouere-skantely scored,
112 þat makis it fouly for to faile.
113 Miles 1. Why carpe yoe so? Faste on a corde
114 And tugge hym to, by toppe and taile.
115 Miles 3. 3a, thou comaundis lightly as a lorde;
116 Come helpe to haale, with ille haile.
117 Miles 1. Nowe certis that schall I doo-
118 Full snelly as a snayle
119 Miles 3. And I schall tacche hym too,
120 Full nemely with a nayle.
121 þis werke will holde, that dar I heete,
122 For nowe are feste faste both his hende.
123 Miles 4. Go we all foure thanne to his feete,
124 So schall oure space be spedely spende.
125 Miles 2. Latte see what bourde his bale myght beete,
126 Tharto my bakke nowe wolde I bende.
127 Miles 4. Owe, this werke is all vnmeete-
128 This boring muste all be amende.
129 Miles 1. A, pees man, for Mahounde,
130 Latte no man wotte that wondir,
131 A roope schall rugge hym doune
132 Yf all his synnous go asoundre.
133 Miles 2. þat corde full kyndely can I knytte,
134 þe comforte of this karle to kele.
135 Miles 1. Feste on thanne faste that all be fytte,
136 It is no force howe felle he feele.
137 Miles 2. Lugge on yoe both a litill yoitt.
138 Miles 3. I schalle nought sese, as I haue seele.
139 Miles 4. And I schall fonde hym for to hitte.
140 Miles 2. Owe, haylle!
141 Miles 4. Hoo nowe, I halde it wele.
142 Miles 1. Haue done, dryue in that nayle,
143 So that no faute be foune.
144 Miles 4. þis wirkyng wolde noyot faile
145 Yf foure bullis here were boune.
146 Miles 1. Ther cordis haue evill encressed his paynes,
147 Or he wer tille the booryngis brought.
148 Miles 2. 3aa, assoundir are bothe synnous and veynis
149 On ilke a side, so haue we soughte.
150 Miles 3. Nowe all his gaudis nothyng hym gaynes,
151 His sauntering schall with bale be bought.
152 Miles 4. I wille goo saie to oure soueraynes
153 Of all this werkis howe we haue wrought.
154 Miles 1. Nay sirs, anothir thyng
155 Fallis firste to youe and me,
156 þei badde we schulde hym hyng
157 On heghte that men myght see.
158 Miles 2. We woote wele so ther wordes wore,
159 But sir, that dede will do vs dere.
160 Miles 1. It may not mende for to moote more,
161 þis harlotte muste be hanged here.
162 Miles 2. The mortaise is made fitte therfore.
163 Miles 3. Feste on youre fyngeres than, in feere.
164 Miles 4. I wene it wolle neuere come thore-
165 We foure rayse it noyot right to-yere.
166 Miles 1. Say man, whi carpis thou soo?
167 Thy liftyng was but light.
168 Miles 2. He menes ther muste be moo
169 To heve hym vppe on hight.
170 Miles 3. Now certis, I hope it schall noght nede
171 To calle to vs more companye.
172 Methynke we foure schulde do this dede
173 And bere hym to yoone hille on high.
174 Miles 1. It muste be done, withouten drede.
175 No more, but loke yoe be redy,
176 And this parte schalle I lifte and leede;
177 On lenghe he schalle no lenger lie.
178 Therfore nowe makis you boune,
179 Late bere hym to yoone hill.
180 Miles 4. Thanne will I bere here doune,
181 And tente his tase vntill.
182 Miles 2. We twoo schall see tille aythir side,
183 For ellis this werke wille wrie all wrang.
184 Miles 3. We are redy.
185 Miles 4. Gode sirs, abide,
186 And late me first his fete vp fang.
187 Miles 2. Why tente yoe so to tales this tyde?
188 Miles 1. Lifte vppe!
189 Miles 4. Latte see!
190 Miles 2. Owe, lifte alang.
191 Miles 3. Fro all this harme he schulde hym hyde
192 And he war God.
193 Miles 4. þe deuill hym hang!
194 Miles 1. For-grete harme haue I hente,
195 My schuldir is in soundre.
196 Miles 2. And sertis I am nere schente,
197 So lange haue I borne vndir.
198 Miles 3. This crosse and I in twoo muste twynne,
199 Ellis brekis my bakke in sondre sone.
200 Miles 4. Laye downe agayne and leue youre dynne,
201 þis dede for vs will neuere be done.
202 Miles 1. Assaie sirs, latte se yf any gynne
203 May helpe hym vppe withouten hone,
204 For here schulde wight men worschippe wynne,
205 And noght with gaudis al day to gone.
206 Miles 2. More wighter men than we
207 Full fewe I hope yoe fynde.
208 Miles 3. þis bargayne will noght bee,
209 For certis me wantis wynde.
210 Miles 4. So wille of werke neuere we wore-
211 I hope this carle some cautellis caste.
212 Miles 2. My bourdeyne satte me wondir soore,
213 Vnto the hill I myght noght laste.
214 Miles 1. Lifte vppe, and sone he schall be thore,
215 Therfore feste on youre fyngeres faste.
216 Miles 3. Owe, lifte!
217 Miles 1. We, loo!
218 Miles 4. A litill more.
219 Miles 2. Holde thanne!
220 Miles 1. Howe nowe?
221 Miles 2. þe werste is paste.
222 Miles 3. He weyes a wikkid weght.
223 Miles 2. So may we all foure saie,
224 Or he was heued on heght
225 And raysed in this array.
226 Miles 4. He made vs stande as any stones,
227 So boustous was he for to bere.
228 Miles 1. Nowe raise hym nemely for the nonys
229 And sette hym be this mortas heere,
230 And latte hym falle in alle at ones,
231 For certis that payne schall haue no pere.
232 Miles 3. Heue vppe!
233 Miles 4. Latte doune, so all his bones
234 Are asoundre nowe on sides seere.
235 Miles 1. þis fallyng was more felle
236 þan all the harmes he hadde.
237 Nowe may a man wele telle
238 þe leste lith of this ladde.
239 Miles 3. Methynkith this crosse will noght abide
240 Ne stande stille in this morteyse yoitt.
241 Miles 4. Att the firste tyme was it made ouere-wyde;
242 þat makis it wave, thou may wele witte.
243 Miles 1. Itt schall be sette on ilke a side
244 So that it schall no forther flitte.
245 Goode wegges schall we take this tyde
246 And feste the foote, thanne is all fitte.
247 Miles 2. Here are wegges arraied
248 For that, both grete and smale.
249 Miles 3. Where are oure hameres laide
250 þat we schulde wirke withall?
251 Miles 4. We haue them here euen atte oure hande.
252 Miles 2. Gyffe me this wegge, I schall it in dryue.
253 Miles 4. Here is anodir yoitt ordande.
254 Miles 3. Do take it me hidir belyue.
255 Miles 1. Laye on thanne faste.
256 Miles 3. 3is, I warrande.
257 I thryng thame same, so motte I thryve.
258 Nowe will this crosse full stabely stande,
259 All-yf he raue thei will noght ryve.
260 Miles 1. Say sir, howe likis you nowe,
261 þis werke that we haue wrought?
262 Miles 4. We praye youe sais vs howe
263 3e fele, or faynte yoe ought.
264 Jesus. Al men that walkis by waye or strete,
265 Takes tente yoe schalle no trauayle tyne.
266 Byholdes myn heede, myn handis, and my feete,
267 And fully feele nowe, or yoe fyne,
268 Yf any mournyng may be meete,
269 Or myscheue mesured vnto myne.
270 My fadir, that alle bales may bete,
271 Forgiffis thes men that dois me pyne.
272 What thei wirke wotte thai noght;
273 Therfore, my fadir, I craue,
274 Latte neuere ther synnys be sought,
275 But see ther saules to saue.
276 Miles 1. We, harke, he jangelis like a jay.
277 Miles 2. Methynke he patris like a py.
278 Miles 3. He has ben doand all this day,
279 And made grete meuyng of mercy.
280 Miles 4. Es this the same that gune vs say
281 That he was Goddis sone almyghty?
282 Miles 1. Therfore he felis full felle affraye,
283 And demyd this day for to dye.
284 Miles 2. Vath, qui destruis templum!
285 Miles 3. His sawes wer so, certayne.
286 Miles 4. And sirs, he saide to some
287 He myght rayse it agayne.
288 Miles 1. To mustir that he hadde no myght,
289 For all the kautelles that he couthe kaste.
290 All-yf he wer in worde so wight,
291 For all his force nowe he is feste.
292 Als Pilate demed is done and dight,
293 Therfore I rede that we go reste.
294 Miles 2. þis race mon be rehersed right,
295 Thurgh the worlde both este and weste.
296 Miles 3. 3aa, late hym hynge here stille
297 And make mowes on the mone.
298 Miles 4. þanne may we wende at wille.
299 Miles 1. Nay goode sirs, noght so sone,
300 For certis vs nedis anodir note:
301 þis kirtill wolde I of you craue.
302 Miles 2. Nay, nay sir, we will loke be lotte
303 Whilke of vs foure fallis it to haue.
304 Miles 3. I rede we drawe cutte for this coote-
305 Loo, se howe sone-alle sidis to saue.
306 Miles 4. The schorte cutte schall wynne, that wele yoe woote,
307 Whedir itt falle to knyght or knave.
308 Miles 1. Felowes, yoe thar noght flyte,
309 For this mantell is myne.
310 Miles 2. Goo we thanne hense tyte,
311 þis trauayle here we tyne &c.
© Copyright, 2007. From Stage to Page and Gerard NeCastro. All Rights Reserved.
All materials on this page are free to all users. We only ask two things of you. First, please be sure to cite the source properly: the citation is listed below. Second, if you would, please take one minute to say hello and tell us that you are using the pages: a quick email to necastro@maine.edu would be perfect.
Proper Citation: NeCastro, Gerard. The York Cycle, Play 35 - Crucifixio Christi. From Stage to Page - Medieval and Renaissance Drama. http:www.umm.maine.edu/faculty/necastro/drama. Date Visited.